சத்திரம்

ஆன்மிகம் என்பது அறிந்துகொள்வது அல்ல உணர்ந்துகொள்வது



ஒவ்வொரு மனிதனுக்கும் வாழ்கையில் ஒரு ஆசை, ஒரு தேடுதல் இருக்கும். அவன் வாழ்க்கையின் லட்சியமாக எதை நினைத்தானோ அதை அடையத் துடிப்பான், அடைந்த பின்பு புதிய தேவையை உருவாக்குவான். மனிதனின் ஆசைக்கும், தேவைக்கும் ஒரு முடிவே கிடையாது. அவனின் ஆசையையும் கட்பனையையும் தேடியே ஓடிக்கொண்டே இருப்பான்.

ஒரு கால கட்டத்தில் நான் தேடிய எதுவுமே உண்மை இல்லை. அனைத்துமே அழியக் கூடியது என்று உணரும் சமயம் மரணம் வந்து விடுகிறது. கடைசி வரையில் மனித வாழ்வின் நோக்கம் அறியாமல் வாழ்வை முடித்துக் கொள்கிறான். ஏன் பிறந்தோம்?, ஏன் வாழ்கிறோம்?, ஏன் மரணிக்கிறோம்?, மரணத்துக்குப் பின் என்ன நடக்கும்?. இப்படி எதுவுமே தெரியாமல், அறியாமல் அலையும் மனிதனை, நெறிப்படுத்த பயன்படும் ஒழுக்கத்துக்குப் பெயர்தான் ஆன்மீகம்.

ஆன்மிகம் என்பது ஒரு மதம் சார்ந்த விஷயமல்ல. மதத்தில் ஆன்மீகம் உண்டு, ஆனால் ஆன்மிகத்தில் மதமில்லை. தன்னை, தன் சுயத்தை அறியும் வழிமுறையே ஆன்மீகம். ஆன்மிகத்தை நம் முன்னோர்கள், மனிதனின் பக்குவ நிலைக்கு ஏற்ப நான்கு நிலைகளாகப் பிரித்தார்கள். பக்தி, கர்ம, கிறியா, ஞான என்று நன்கு வழிமுறைகள் உண்டு. இவற்றில் உயர்வு தாழ்வு என்று சொல்ல முடியாது, மனிதனின் மனநிலைக்கு ஏற்ப அவனுக்கு உகந்ததை தேர்ந்தெடுக்கலாம்.

இந்த உலகத்தில் எதை பற்றி கேட்டலும் மனிதனுக்கு தெரியும், கம்ப்யூட்டர், அறிவியல், பூலோகம், மறுத்தும், கணிதம் என எல்லாம் தெரிந்து வைத்திருக்கிறான், அனால் அவன் யார் என்பது மட்டும் அவனுக்குத் தெரியாது. அதை தேடி அடைய தைரியமில்லாமல், அடுத்தவர் அனுபவங்களையும், கட்டுக் கதைகளையும் நம்பிக்கொண்டிருக்கிறான்.

இதில் வேடிக்கை என்னவென்றால், அவனுக்கே ஒன்றும் தெரியாது, ஆனால் அந்த அறியாமையை அவன் குழந்தைகளுக்கும் மனதில் பதிய வைக்கிறான். தன்னை அறிவது, தன்னை பற்றிய உண்மைகளை தனது சொந்த அனுபவங்கள் மூலம் அறிவது மட்டுமே ஆன்மிகம்.



The Law of attraction, ஈர்ப்பு விதி- என்று நீங்கள் கேள்விப்பட்டிருப்பீர்கள். இந்த ஈர்ப்பு விதி எப்படிச் செயல்படுகிறது என்பதில் தான் இப்போது பிரச்சனை. ஆளுக்கு ஒரு மாதிரியாகச் சொல்கிறார்கள். பெரும்பாலும் நினைத்தால் நடக்கும், ஆசைப்பட்டால் நடக்கும், கனவு கண்டால் நடக்கும், என்பதுதான் பலர் கூறும் ஈர்ப்பு விதியாக இருக்கிறது.

நினைப்பதும் ஆசைப்படுவதும் உண்மையில் நடக்க ஆரம்பித்தாள், இந்த உலகமே தலைகீழாக இருந்திருக்கும். இந்த உலகின் ஒவ்வொரு மனிதனும் அரசனாக அல்லவா இருந்திருப்பான். பசியோடு உறங்கப் போகும் மனிதனின் அடிப்படை ஆசையே உணவு மட்டும்தான், ஆனால் அதை கூட அடைய முடியாமல் போகிறது. ஏழைகளின் கனவு பணம், பலருக்கு கனவாகவே போகிறது, இறுதிவரை வசதி வாய்ப்புகள் இல்லாமல் போகிறது. கஷ்டத்தில் உள்ளவனுக்கு நிம்மதி தேவை, அனால் அது பலருக்கு கிடைப்பதே இல்லை. அப்படியானால் ஈர்ப்பு விதி என்றால் என்ன? அது எப்படி செயல்படுகிறது?.

ஈர்ப்பு விதி என்பது மனிதன் ஆசைப்படுவதையோ, அவன் விரும்புவதையோ, அவன் கனவு காண்பதையோ, அவன் நம்புவதையோ கொடுப்பது அல்ல. ஒரு மனிதனுக்கு என்ன தகுதி இருக்கிறதோ அதைக் கொடுப்பதுதான் ஈர்ப்பு விதி.

Law of attraction? ஈர்ப்பு விதி என்பது எப்படி செயல்படுகிறது என்றால. இயற்கையின் படைப்பில் மனிதனை அனைத்து தேவைகளும் பூர்த்தி செய்ய பட வேண்டும். அதுதான் சட்டம். ஒரு மனிதனுக்கு ஒரு தேவை, ஆசை ஏற்படும் போது. அதை அடைவதற்குரிய வழிகாட்டுதலும், வழிகளும், அறிவும் அவனுக்கு வழங்கப்படும். அதை முறையே பயன்படுத்தினால், அவன் ஆசைப்பட்ட அனைத்தும் கிடைக்கும்.

இயற்கை பேசுவதை, அது காட்டும் அறிகுறிகளை கொஞ்சம் உன்னிப்பாகக் கவனிக்க வேண்டும். நம் வாழ்கையில், நம்மை சுற்று நடப்பதை உன்னிப்பாக கவனிக்க ஆரம்பித்தல், அனைத்தையும் நிச்சயம் அடையலாம். நீங்கள் ஆசைப்படும் அனைத்தும் நடக்க வேண்டுமா?. மிகச் சுலபம், அதை அடையத் தகுதியை வளர்த்துக் கொள்ளுங்கள். நீங்கள் ஆசை நிச்சயம் நிறைவேறும்.

ஒரு விவசாயியின் நோக்கமென்ன? அவரின் தேவையென்ன?. போதிய விளைச்சல் மட்டும்தான். அவர் ஆசைப்பட்ட மாதிரியே நெல் விளைந்து நிற்கிறது. அவர் தேவை நிறைவேறுகிறது. அந்த நெல்லின் விளைச்சலுக்கு, நேரடியாக அந்த நெல்லுக்கு அவர் எதையாவது செய்தாரா?. அந்த நெற்பயிருக்கும் அவருக்கும் ஏதாவது நேரடி தொடர்பு உண்டா?. எதுவும் கிடையாது, ஆனாலும் அவர் ஆசைப்பட்ட விளைச்சல் உருவானது.ஒரு விவசாயியின் நோக்கமென்ன? அவரின் தேவையென்ன?. போதிய விளைச்சல் மட்டும்தான். அவர் ஆசைப்பட்ட மாதிரியே நெல் விளைந்து நிற்கிறது. அவர் தேவை நிறைவேறுகிறது. அந்த நெல்லின் விளைச்சலுக்கு, நேரடியாக அந்த நெல்லுக்கு அவர் எதையாவது செய்தாரா?. அந்த நெற்பயிருக்கும் அவருக்கும் ஏதாவது நேரடி தொடர்பு உண்டா?. எதுவும் கிடையாது, ஆனாலும் அவர் ஆசைப்பட்ட விளைச்சல் உருவானது.

அப்படி என்றால், அந்த நெற்பயிர்கள் உருவாக அவர் எதுவும் செய்யவில்லையா?. செய்யாமல் எப்படி இருப்பார்?. கால நேரம் பார்த்து சரியான நேரத்தில், முறையாக நிலத்தை உழுதார், நீர் பாய்ச்சினார், நெல் மணிகளைத் தூவினார், தேவைப்படும்போதெல்லாம் நீர் விட்டார், இயற்கை உரம் போட்டார், களை எடுத்தர், நெற்பயிர்கள் உருவாக சூழ்நிலைகளை மட்டும் சரியாக அமைத்துத் தந்தார். இயற்கை அவருக்கு உதவி செய்தது. அவரின் உழைப்புக்குச் சம்பளம் கிடைத்தது, அவர் ஆசைப்பட்ட விளைச்சல் உருவானது. மற்றபடி அந்த நெற்பயிருக்கும் அவருக்கும் எந்த சம்பந்தமுமில்லை.

இதுதான் மனித வாழ்க்கை.
மனிதன் ஆசைப்படும் அனைத்தையும் இயற்கை வழங்கும், மனிதனின் தேவைகள் அனைத்தும் நிறைவேற்றப்படும். ஆனால் அதன் மீது அவனுக்கு எந்த அதிகாரமுமில்லை. மனிதனுக்கு ஆசைப்படும் அதிகாரமுண்டு ஆனால் எனக்கு அது வேண்டும், இது வேண்டும் என்று கேட்கும் அதிகாரமில்லை.
மனிதன் எதற்காக தன் உழைப்பைப் போடுகிறானோ அது மட்டுமே அவனுக்குக் கிடைக்கும். நல்லதோ கெட்டதோ, எதற்காக உழைத்தாலும் இயற்கை உதவி செய்யும், அது கண்டிப்பாக கொடுக்கப்படும். எந்த மனிதனின் வாழ்க்கையிலும் கடவுளும் இயற்கையும் குறுக்கிட மாட்டார்கள். மனிதர்கள் தனக்கு தேவையானதைத் தானே தேடிக்கொள்ளும் முறையில்தான் படைக்கப்பட்டிருக்கிறார்கள்.

எதை பற்றியும் கவலைப்படாதீர்கள், பயப்படாதீர்கள். உங்கள் ஆசைகள் நிறைவேற உங்களால் முடிந்த உழைப்பை மட்டும் வழங்குங்கள். நீங்கள் நினைத்தது நிட்சயம் நிறைவேறும்.

குறள் 619:
தெய்வத்தான் ஆகா தெனினும், முயற்சிதன்மெய்வருத்தக் கூலி தரும்.



கர்மவினை என்பது என்ன?
கர்மா என்பதும் வினை என்பதும் ஒரே பொருள்தான், மொழி மட்டும் வெவ்வேறு. கர்மா என்ற சமஸ்கிருத வார்த்தைக்கு, கர்மம் அல்லது செயல் என்று பொருள். அவர் அவர் செய்த செயலை தான் கரமா என்ற வார்த்தை குறிக்கிறது. யார் எதைச் செய்தாலும், அதற்கான பலனை அனுபவித்தே தீரவேண்டும். பலன் நன்மையானதா தீமையானதா என்பது செய்த செயலைப் பொறுத்தது. கர்மத்தின் விளைவுக்கு ரிபக்க என்று பெயர்.

ஒருவன் மனதில் பதிவாகும் அனைத்துமே கர்மாக்கள் தான். அவற்றுக்கு பிரதிபலன்கள் உண்டு. தன் சுய உணர்வு இல்லாமல் தவறுதலாக செய்த செயல்களுக்கு கர்மகணக்கு கிடையாது. மனப்பதிவு இல்லை என்றால் கர்மா இல்லை.

கர்மா என்பது உண்மையில் உண்டா?
பலருக்கு கர்மா என்று ஒன்று உண்டா? கர்மகணக்கு என்று ஏதாவது உண்டா? என்று குழப்பமும் சந்தேகமும் இருக்கும். சிலர் கர்மா என்பது இந்து மதமோ, புத்த சமன மதமோ சம்பந்தபட்டது என்று எண்ணுகிறார்கள். உண்மையில் கர்மா என்பது செயலும் அதன் விளைவுகளும் தான். மனிதன் செய்யம் ஒவ்வொரு செயலுக்கும் ஒரு விளைவு உண்டு என்பது அனைவருக்கும் தெரியும். மனிதன் செய்யும் செயல்களில் உருவாகும் சூட்சமமான விளைவுதான் கர்ம கணக்கு என்பது.

கர்மாவின் விளைவுகள்
கர்மாவின் விளைவுகள் இப்படிதான் இருக்கும் என்று யாராலும் சொல்ல முடியாது. இயற்கையின் கணக்கை யாரும் கணக்கிடவோ கண்டுபிடிக்கவோ முடியாது. கர்மத்தின் விளைவுகள் மட்டும் இன்று வரை யாருக்கும் தெரியாது. இது சரி, இது தவறு என்று மனிதர்கள் போடும் கணக்குக்கும், இயற்கையின் கர்ம கணக்குக்கும் சம்பந்தம் கிடையாது.

மந்திரத்தில் மாங்காய் காய்க்காது
அந்த யோகம் செய்யுங்கள், இந்த மந்திரம் சொல்லுங்கள், அந்தக் கோயிலுக்கு செல்லுங்கள், இந்த இடத்துக்குச் செல்லுங்கள், அந்த கயிறு கட்டுங்கள், வீட்டில் அதை மாட்டுங்கள், கர்மா கழிந்துவிடும் என்று சொல்வதெல்லாம் அணுவளவும் உண்மை இல்லை.

செய்த செயலுக்கான பலனை அனுபவித்தே ஆக வேண்டும். அது யாராக இருந்தாலும்.

கர்மாவை வெல்லும் ஒரே வழி
கருடன் பறக்க காற்று தடையாக இருக்கும் போது, கருடன் மேகத்துக்கு மேலே சென்றுவிடுமாம். மேகத்தின் மேலே சுதந்திரமாய் பறக்கும். அதைப் போல் கடலில் கொந்தளிப்புகள் வரும்போது கடல் வாழ் உயிரினங்கள், ஆழ்கடலுக்குச் சென்றுவிடும். அங்குப் பாதுகாப்பாக இருக்கும்.

இறை பக்தியில் முழுமையாகத் தன்னை ஈடுபடுத்திக் கொண்டு, அல்லது ஆன்மீகத்தில் ஈடு பட்டு. மேலே சென்றுவிட வேண்டும். அல்லது பற்று அற்ற வாழ்க்கை வாழ்ந்து ஆழமாகச் சென்றுவிட வேண்டும். இவைதான் கர்மாவை மற்றும் வழிகள், வேறு வழிகள் கிடையாது. கடவுளைத் தவிர யாராலும் கர்மாவை மற்ற முடியாது, முடியும் என்றாலும் கடவுள் செய்யமாட்டார்.

அவன் அவன் விதைத்ததை அவன் அவன் அறுவடை செய்தே ஆக வேண்டும். உங்கள் விதைப்பு மனதில் தான் தொடங்கும் அதனால் மனதைப் பாதுகாத்து கொள்ளுங்கள்.

மனமில்லாதவர்களுக்கு கர்ம கணக்கு இல்லை
கர்மா மனம் மூலமாக, சூட்சமமாக செயல்படுகிறது. மனதைத் தெளிவு படுத்தி சுத்தமாக வைத்திருந்தால் மட்டுமே, பழைய கர்மாக்களின் தாக்கத்தில் இருந்து தப்பிக்கலாம். மற்றபடி செய்ததை அனுபவித்தே ஆகா வேண்டும். பற்று அறுத்தவர்கள் மட்டும் விதிவிலக்கு. கர்மா மனதிலிருந்து செயல்படுவதால், மனம் இல்லாதவர்களுக்கு கர்மா கிடையாது.

புத்தர் சொல்லும் கர்மா
புத்தர் சொல்கிறார், அவர் அவர் செய்த செயல்களின் பலன்கள் (கர்மபலன்) மாடு பூட்டப்பட்ட மாட்டுவண்டி போல். மனிதன் தான் மாடு அவன் செய்த செயல்கள்தான் வண்டி. மாடு செல்லும் இடங்களுக்கெல்லாம் வண்டி பின் தொடரும் என்கிறார்.

கர்மாவில் இருந்து தப்பிக்க
வாழ்நாள் முழுவதும் நிம்மதியாக சந்தோசமாக வாழ வேண்டுமா?. மனதறிந்து யாருக்கும் எந்த தீங்கும் செய்யாதீர்கள். மனிதன், மிருகம், நீர் வாழ் உயிரினங்கள், பூச்சிகள், தாவரங்கள், இயற்கை, என யாருக்குத் தீங்கு செய்தாலும், கண்டிப்பாக பலனை அனுபவித்தே ஆகா வேண்டும்.

குறள் 317:
எனைத்தானும் எஞ்ஞான்றும் யார்க்கும் மனத்தானாம், மாணாசெய் யாமை தலை.

மு.வரதராசனார் உரை:
எவ்வளவு சிறியதாயினும் எக்காலத்திலும் எவரிடத்திலும் மனதால் எண்ணி உண்டாகின்ற துன்பச்செயலைச் செய்யாதிருத்தலே நல்லது.



மனித வாழ்கையில் ஏதாவது எதிர்பாராத விசயம் நடந்தாலோ, தன் புரிதலுக்கு மீறிய விஷயங்கள் நடந்தாலோ, தவறான கணவன் மனைவி அமைந்தாலோ, பிள்ளைகள் தவறான விசயங்களைச் செய்தாலோ, பிடிக்காத விசயம் ஏதாவது நடந்தாலோ அல்லது குணப்படுத்த தெரியாத நோய்கள் வந்தாலோ, அதைத் தலைவிதி என்று சொல்லி ஏற்றுக்கொள்ளும் வழக்கம் மக்களிடத்தில் இருக்கிறது. விதி, தலைவிதி, தலை எழுத்து இப்படி ஏதாவது சொல்லி மனதை சமாதானப் படுத்துவார்கள். உண்மையில் விதி என்பது என்ன?.

தலைநகரம் என்று அழைக்கிறோமே அது என்ன தலைக்கு மேலா இருக்கிறது?. தலைமகன் என்று அழைக்கிறோமே அவன் என்ன தலைக்கு மேலா இருக்கிறான்?, அல்லது தலையால் பிறந்தானா?. இல்லையல்லவா!, அதைப்போல் தான் தலையெழுத்து என்பதும் மனிதனின் தலையில் எழுதப்பட்ட எழுத்து அல்ல. தலைநகரம், தலைமகன், தலைமை, தலைவன் போன்ற வார்த்தைகளில் வரும் தலை என்ற சொல், முதல், முதன்மை என்ற அர்த்தத்தைத் தான் குறிக்கிறது.

தலையெழுத்து என்பதும் முதன்மையான எழுத்து என்றுதான் குறிக்கிறது. தலையெழுத்து என்பது மனித இனம் உருவாக்கப்படும் முன் எழுதப்பட்ட முதல் எழுத்து அல்லது முதல் விதி என்றுதான் பொருள்கொள்ள வேண்டும்.

மனிதர்கள் கண்டு நடுங்கும், பலர் ஏமாற்றப் பயன்படுத்தும் சொல், பலர் ஏமாறக் காரணமாக இருக்கும் சொல் விதி. விதி என்ற சொல்லை நாம் எங்கு எல்லாம் பயன் படுத்துகிறோம் என்று பார்ப்போம். சாலைவிதி, பிரபஞ்ச விதி, ஈர்புவிதி, ஆகமவிதி, இப்படிப் பல இடங்களில் விதி என்ற சொல்லை பயன்படுத்துகிறோம். இப்போது சொல்லுங்கள் விதி என்பது என்ன?.

விதி என்ற சொல் சட்டம் என்றுதானே பொருள் தருகிறது. ஆம், “விதி” என்றாலும் “தலை எழுத்து” என்றாலும், “தலை விதி" என்றாலும் ஒரே அர்த்தம்தாம். நாம் தான் பயத்தால் தவறாக பொருள் கொள்கிறோம். விதி, தலைவிதி, தலையெழுத்து இந்த மூன்று சொல்லுக்கும் முதலில் எழுதப்பட்ட சட்டம் என்றுதான் அர்த்தம்.

மனிதன் எப்படி வாழ வேண்டும். மனித இனம் எப்படி செயல்பட வேண்டும் என்று இந்த உலகத்தில் இயற்கையின் சட்டம் ஒன்று உள்ளது அதைத்தான் இந்த விதி என்ற சொல் குறிக்கிறது. மற்றபடி ஒவ்வொரு மனிதனின் தலையிலும் கடவுள் எதையாவது எழுதி வைத்திருப்பார் என்பது பேதைமையன்றி வேறில்லை. கடவுள் எந்த மனிதனின் வாழ்க்கையிலும் குறுக்கிடமாட்டார். மனிதர்கள் தானாக எதையாவது கற்பனை செய்துகொண்டு இறைவனின் மீது பழியை போடுகிறார்கள்.

விதிக்கு சில உதாரணங்கள் சொல்கிறேன். மிளகாய் காரமாக இருக்கும், தேன் இனிக்கும், உப்பு கரிக்கும், பல் கூர்மையான விலங்குகள் மாமிசம் உண்ணும், பல் தட்டையான விலங்குகள் தாவரங்களை உண்ணும், மீன்கள் நீரில் வாழும், விலங்குகள் தரையில் வாழும், பறவைகள் பறக்கும். இப்படி பல இயற்கையின் படைப்பு விதிகள் இருக்கிறது.

அனைத்து வகை நீரையும் மனிதன் பயன்படுத்தலாம் ஆனால் கடல் நீரைப் பயன்படுத்த முடியாது. சில தாவரங்களை உண்ணலாம் சில வற்றை உண்ணக்கூடாது. இந்த உலகில் சில வேலைகளை மனிதன் செய்யலாம் சிலவற்றைச் செய்ய முடியாது. இப்படி பல கட்டுப்பாட்டு விதிகள் உள்ளது.

மனிதனின் உடலிலேயே உள்ளுறுப்புகளின் மேல் அவனுக்கு எந்த உரிமையும் கிடையாது. மனிதனால் உள்ளுறுப்புகளைக் கட்டுப்படுத்த முடியாது. உடலின் வெளி உருப்புகளில் கூட அவனுக்கு முழு கட்டுப்பாடும் கிடையாது.

இப்படி பல கட்டுப்பாட்டு விதிகள் மனிதனுக்கும் உலகில் வாழும் மற்ற உயிரினங்களுக்கும் விதிக்கப்பட்டிருக்கிறது. இவற்றைத்தான் நம் முன்னோர்கள் விதி (சட்டம்) என்று அழைத்தார்கள். இப்படி இயற்கை விதித்த சட்டங்களை மீறுவதுதான் மனிதனின் அனைத்துத் துன்பங்களுக்கும் தொந்தரவுகளுக்கும் காரணம்.

விதிமீறல் உதாரணம்
பசித்தால் சாப்பிட வேண்டும், தாகமிருந்தால் தண்ணீர் அருந்த வேண்டும், இது இயற்கையின் சட்டம். இருந்தால் செய்ய வேண்டும் என்றால் இல்லாவிட்டால் செய்ய கூடாது என்பதுதான் சட்டம். பசி இல்லாமல் சாப்பிட கூடாது, தாகமில்லாமல் தண்ணீர் அருந்தக் கூடாது. இந்த உடலின் விதிகளை மீறும்போது உடலில் நோய்கள் உண்டாகிறது. தவறுகள் அனைத்தையும் மனிதர்கள் செய்துவிட்டு உடலில் தொந்தரவு ஏதாவது உருவானால் கடவுள் சோதிக்கிறார் என்றும் எல்லாம் தலைவிதி என்றும் கடவுளின் மீது பழியை போடுவார்கள்.

ஒவ்வொரு எண்ணமும் ஒரு விளைவை உருவாக்கும் என்பது சட்டம். நல்ல எண்ணங்கள் இருப்பவர் ஆரோக்கியமாகவும் நிம்மதியாகவும் வாழ்வார்கள். தீய எண்ணங்கள் உள்ளவர்கள் மற்றும் தவறான மன பதிவுகள் உள்ளவர்கள் மன நிம்மதி இழந்து வாழ்வார்கள் இது இயற்கையின் சட்டம்.

இப்படி வாழ்கையில் இயற்கை விதித்திருக்கும் சட்டங்களை தான் விதி, தலையெழுத்து மற்றும் தலைவிதி என்று நம் முன்னோர்கள் வகுத்தார்கள். இன்னும் நான் இங்குக் கூறாத பல விதிகள் உள்ளன, இப்படி இயற்கை வகுத்த விதிகளை புரிந்துகொண்டு மனிதன் வாழ வேண்டும். எந்தச் சூழ்நிலையிலும் மனம் மறிந்து விதிகளை மீறக்கூடாது.

இயற்கையின் விதிகளை மீறுவோருக்கு அதற்கு ஏற்றவாறு விளைவுகள் உருவாகும். இந்தச் சட்டத்தையும் அதன் விளைவுகளையும் கர்மா என்று புத்தர் வகுத்தார். இயற்கையின் விதிகளைப் புரிந்துகொண்ட மனிதனாய் வாழ்வோம்.